QaHmaj ghajnIS veromer: mu'tay' SachmoHmeH jInmol

Started by Lance R. Casey, March 04, 2010, 12:42:33 PM

Previous topic - Next topic

0 Members and 1 Guest are viewing this topic.

Lance R. Casey

latlh QIn nungeHpu' pal veromer. na'vIy Hol mu'tay' SachmoHlu'meH QaHmaj neH ghaH. QIn vImughta'; tlhIngan Hol vIlo':




Kaltxì, ma oeyä eylan mì LearnNavi.org. Oel ayngati kameie nìwotx.

Satlho'qu' na'vIy HolvaD SunongtaHmo'. mumertaH 'ej muHemmoHtaH ngoDvetlh. QIn law' vIHevpu' 'ej nom jIjang jIH vIneHbej, 'ach 'e' luQatlhmoH ghojmoHwI' Qu'meywIj, latlh Qu'meywIj je. tugh loQ jIjangchoHlaH 'e' vItul, 'ach cha' Doch'e' poQbej na'vIy Hol yej'an 'ej DaH bIH qaSmoHlu'meH De' Sanob vIneH: mu'tay' SachmoHnISlu' 'ej taghwI'pu'vaD ghojmeH De' 'angnISlu'.

mu'tay' SachmoH

DaH SuQumchu'meH na'vIy Hol lulo'laHmo' nuv law' jIQuchqu' 'ej jIyonqu'. 'ach SachnIS na'vIy Hol mu'tay' 'e' 'olpu' vumtaHghachraj. machtaH mu'tay'maj 'ej Doch law' luchelnISlu' Hol lo'laHchu'pa' vay'. maHvaD lI'bej wa'SanID mu' chu'.

'e' qaSmoHlu'meH tlhIHvaD, na'vIy Hol yej'an ghuvpu'vaD jItlhob; jIjatlh: HIQaH. SuQumchu'meH 'ej SuQumqu'meH Dachqu'law'bogh mu'mey, Qargh lutebnISlu'bogh je boSovba' je. jIHvaD potlhqu' qechmeyraj. vaj «mu'tay' SachmoHmeH nab» vIchup. chutHommeyvam pab 'oH:


  • mu'mey boghajnISqu'bogh tetlh yIgher. wej 'ay' ghajmeH tetlhvam yIwav: potlh patlh 'oS permey «A», «B», «C» je.

  • mu'mey tetlh nap neH yInobQo'; peQIj 'ej peDel je. chovnatlhvam yIqel: mu' «ta'» bonobchugh, chay' lo'lu' 'e' boHech? «wo' Dev ta'» pagh «ta'mey Dun, bommey Dun» pagh «batlh Qu' yIta'»? mu''e' ghajbogh na'vIy Hol neH vIparHa', 'ach vaj boQIjnISchu' 'ej lo'chaj bo'aghnISchu'.

  • tlhoy wa' Hol rurbe'meH na'vIy Hol ('ej HolwIj, DIvI' Hol rurbe'qu'meH) jeSnIS yej'anmaj Sar pImbogh ghuv law'. potlhqu' latlh Holmey chovnatlhmey.

  • rIpHom chernISlu' 'ej wej tetlhna' gher 'oH jIHDaq pawpa' bIH. Qapchu'meH rIpHomvam lumuvnISlaw' ghuv Sar, 'ej mu' tetlhmeyraj, Hol vI'oghmeH qeS je luqellu'DI' Sov'a' lughajnISlaw' ghuvvetlh. vay' luchoHchugh, Qu'wIj ngeDmoHmeH 'ej vaQmoHmeH De' luDuD neH 'ej lunapmoH neH.

  • Qu' vIrInmoHmeH poH: QapmeH vummeH nabwIj jItlhob; jIjatlh: «A» tetlh, «B» tetlh je vIHevnIS qaSpa' jar wej jaj wa'maH cha' 'ej ghIq pawlaH «C» tetlh.

mu'mey chu' SanobmeH HovpoH vISovbe', 'ach rapmeH vumpu'ghachraj, vumpu'ghachwIj je batlh jIruchbej 'ej nom jIjang 'e' vInIDbej. 'ej ngoDvam boyajnIS: chaq Hoch mu'mey bochuppu'bogh vIlajlaHbe'. na'vIy nugh, yIn motlh je bopbogh qechmey'e' vIqellaHpa' (qoj vIqel net chaw'pa') chaq muqeSnIS jemS qemeron, 'ej pe'vIl vumba'taH ghaH.

Satlho' «mu'tay' SachmoHmeH jInmol»vaD SujeSmo'. tugh Dochmey bo'oghpu'bogh vIleghmo' jISeybej.

Hol ghojmeH taghwI'pu' De'

tugh QonoSwIj vItagh 'ej pa' na'vIy Hol jatlhlu'meH qeqmeH ta vIcha'. jItaghchu': mu', mu'tlhegh je leghlaHmeH 'ej QoylaHmeH ghojwI'pu', pa' ja'chuqmeH ghItlhmey, mu' tetlhmey, QIjpu'ghachmey, rarwI'mey je tu'lu'. Saja'qa' De' chu' vIghajDI'.


Satlho'qa' na'vIy HolvaD Suvummo' 'ej Sumatlhmo'. DaH Holmaj 'oHbej Holvam'e'.

Qapjaj na'vIy Hol!

jatlh pal

// Lance R. Casey